Laloba inkokheli kahulumende womanyano ivumelene ekusungulweni kukahulumende lo ukuthi kuvulwe amaphephandaba lemisakazo emitsha ezimeleyo eZimbabwe, lokhu akukenzakali njalo intathelizindaba zithi uhulumende ukhanya engazimiselanga ukugcwalisa izethembiso zakhe.
Uhulumende womanyano lo phakathi kweZanu PF leMDC sele nyanga phose ezintathu esebenza, kodwa akula lutho olukhomba ukuthi uzimisele ukulungisisa konke okuphathelane lokwethulwa kwezindaba ngokukhululekileyo.
Umsekeli kamgcinisihlalo wenhlanganiso ekhankasela ukwethulwa kwezindaba ngokukhululekileyo, iMedia Institute for Southern Africa (MISA-Zimbabwe), uMnu Njabulo Ncube, uthi kuyadanisa ukuthi akukabi lamaphephandaba asivuliwe kanye lemisakazo.
Ngalokhu uNcube uthi intathelizindaba zeZimbabwe azilalutho lokuthakazelela ngoNkwenkwezi mhlaka 3, okulilanga lokuthakazelela umsebenzi wentatheli emhlabeni jikelele ele World Press Freedom day.
UNcube uthi okunye okudanisayo yikuthi kulentathelizindaba ezimeleyo ethatha imfanekiso edingwa ngamapholisa uShadreck Manyere. UManyere ubebotshwe ndawonye labasekeli beMDC abathi ukisimusi Dhlamini kanye loGhandi Mdzingwa ekuqaliseni komnyaka besetheswa icala lokufuna ukugenqula uhulumende kaMongameli Mugabe.
Abathathu laba bakhululwe kumaviki ambalwa edluleyo, kodwa amapholisa abikwa semdinga njalo. UDhlamini loMudzingwa babotshwe kunsuku ezedluleyo njalo basezandleni zamapholisa laloba nje besesibhedlela lapho abelatsha khona amanxeba abawathole ngokuhlukuluzwa ngamapholisa besesitokisini.
Inhlanganiso yeNational Association of Black Journalists, exhile kweleMelika ibike ngoLwesine ukuthi sinikeze uManyere umvuzo ngokwenza umsebenzi wakhe engelakwesaba.
Umsekeli kamgcinisihlalo weMISA, uNjabulo Ncube utshele intathelizindaba yeStudio 7 uGibbs Dube ukuthi kusakude phambili ukuthi amaphephandaba lemisakazo ezimele yodwa ivulwe kweleZimbabwe.
