Usibalukhulu webhanga elikhulu lelizwe iReserve Bank of Zimbabwe (RBZ) uMnu. Gideon Gono uthi amabhanga emazweni asebenzela eZimbabwe ayala ukunika izikwelede abantu abafakelwe izijeziso zenotho ngamazwe entshonalanga, sokumele aqaphele ngoba uhulumende elakho ukuwathathela amanyethelo abuhlungu.
Esethula umbiko wezenotho we Monetary Policy Statement yenyanga eziyisithupha zomnyaka ka 2011, uMnu. Gono uthi abasekeli bebandla le Zanu PF kabenelisi ukuthola izikwelede emabhanga anjenge Standard Chattered Bank le Barclays Bank ngenxa yokuthi alobudlelwano lamazwe afakela uMongameli Robert Mugabe labanye bakhe izijeziso zenotho.
Uphinde wathi lokhu sokumele kuphele ngoba kuzondisa abantu abafakelwa izijeziso lezi lozulu eZimbabwe.
Ingcwethi kwezenotho uMnu. Masimba Kuchera uthi kunzima ukuthi amabhanga la anike abasekeli be Zanu PF laba izikwelede njengoba edabuka emazweni afaka izijeziso zenotho.
