Amanye amalunga enhlanganiso zababalisi athi iZimbabwe Teachers Assocation, Progressive Teachers Union of Zimbabwe kanye le Teachers Union of Zimbabwe kazisela nhlelo ezilohlonzi ezinjengo kubakhela izindlu, ukuthenga imota kanye lokududuza abafelweyo.
Amalunga la atshele iStudio 7 ukuthi athwala nzima nxa edinga uncedo kunhlanganiso lezi ezazisaziwa ngokwakhela ababalisi izindlu lokunika abagulayo umuthi wokwenqabela ukumemetheka kwegcikwane leHIV.
Athi okumangalisayo yikuthi abaqondisi benhlanganiso lezi balezindlu ezinhle okumangalisayo lezimota ezethusa uzulu.
Umbalisi ubhadala itshumi lamadola ngenyanga nxa eku ZIMTA kuthi-ke lowo oku PTUZ le TUZ ukhokha amadola ayisitshiyangalombili ngenyanga.
Lokhu kutsho ukuthi nxa amalunga la ebhadala ngemfanelo ngenyanga, inhlanganiso lezi zibuthanisa inkulungwane ezingamakhulu edlula ayisithupha zama dollar-$640,000 ngenyanga.
Umbalisi ohlala eHarare ongafunanga ukuqanjwa ngegama uthi inhlanganiso lezi ziqila ababalisi ngokungabenzeli inhlelo ezibasuthisayo.
Kodwa-ke umqondisi we ZIMTA uMnu. Sifiso Ndlovu uthe inhlanganiso yakhe ilenhlelo ezimangalisayo ezijabulisa ababalisi.
