Amalunga eZanu PF kudale leSenate athi umthetho we Reserve Bank of Zimbabwe Amendment Bill kumele uguqulwe ukuze uphume uphungula amandla kamphathintambo obona ngezemali uMnumzana Tendai Biti okungamelanga njalo ukuthi abelamandla okukhetha abantu ababumba ikomidi ebona ngezokuhlolisisa impahla lamabhuku emali ebhanga elikhulu lelizwe iReserve Bank of Zimbabwe.
USenator Obert Gutu ongu Chief Whip webandla le Movement for Democratic Change ekhokhelwa nguMnu. Morgan Tsvangirai uthi amalunga ebandla leZanu PF enze inguquko ezilitshumi lanye afisa ukuthi kumele zimumethwe yilu mthetho lapho usuphuma, okutsho ukuthi sokumele ubiselwe edale le House of Assembly lapho kuvulwa iphalamende ngoNhlolanja.
Eyinye yalezinguquko ezenziwe nguchief whip we Zanu PF uNkosikazi Monica Mutsvangwa yikuthi abasekeli abathathu baka Mnu. Gideon Gono ongusibalukhulu weRBZ akumelanga baxotshwe umsebenzi.
UGutu uthi phezu kokubona ukuthi ibandla le Zanu PF lilenhloso yokudiliza umthetho lo ovunyelenwe edale le House of Assembly wasudluliselwa kweleSenate, ibandla lakhe selibone kuyimfanelo ukuthi kukhitshwe okunye okumunyethwe yilumthetho ocelwe libandla le Zanu PF kusenzelwa ukuthi uGono lalabo asebenza labo abacatshangelwa ukuthi batshaphaza imali yalelibhanga bengabotshwa.
UMnu. George Mkwananzi ingcwethi ecubungula ezombusazwe utshele uGibbs Dube we Studio 7 ukuthi ibandla le Zanu PF lizama ukufihla imboza eyaphekwa nguMnu. Gono njalo lelibandla lifisa ukuqondisa umsebenzi weRBZ, ukwenzela ukuthi libelemali yokubhadalela inhlelo zalo.
