Abacubungula ezombusazwe bathi amazwi kaMongameli weMelika, uMnu Barack Obama awokuthi abantu abanengi babulawa libutho leFive Brigade ngesikhathi sempi yeGukurahundi akhomba ukuthi labo abenza ihlazo leli balakho ukudonselwa emthethwandaba we International Court of Justice ngolunye usuku bathoniswe.
U Obama ubambe udaba lweGukurahundi ngoMvulo eseWhite House enikeza uNkosazana Magodonga Mahlangu oweWomen of Zimbabawe Arise (WOZA) lenhlanganiso yakhe izicoco zeJohn F. Kennedy njengenhlonipho yokulwela amalungelo oluntu.
UMongameli Obama uchaze uNkosazana Mahlangu njengomuntu olesibindi njalo ongomunye wababona ucuku lwebutho le Five Brigade ngeminyaka yabo 1980 lapho elacobodisa khona inengi labantu esabelweni seMatabeleland leMidlands.
Uphinde wathi abantu abanengi ababulawa libutho leli, lona elalolongwa zingcwethi zeNorth Korea, baphoselwa emathuneni omlahlwa dwayi. Kubikwa ibutho leGukurahundi libulale abantu besiNdebeleni abangafika inkulungwane ezingamatshumi ababili.
Uhulumende kaMongameli Robert Mugabe wasungula impi le esithi udinga abahlamuki ababesekelwa libandla le PF Zapu, lona elalikhokhelwa nguMnua Joshua Mqabuko Nkomo.
U Nkomo wacina engena ku Zanu PF lebandla lakhe ngomnyaka ka 1987 ngenjongo yokuqeda impi le, yona eyayisibulalise abasekeli bebandla lakhe abazinkulungwana lozulu nje makhaza.
Ingcwethi ecubungula ezombusazwe uMnu Joshua Mhambi utshele uGibbs Dube weStudio 7 ukuthi inkulumo ka Mongameli Obama izavula amasango okuthi icala lembule ingubo lingene kulabo abenza ihlazo leli babotshwe bahanjiswe emthethwandaba wamazwe omhlaba.
