Ibhanga le Stanbic Bank Zimbabwe Limited kubikwa selivumile ukubumba isikhwama esilezigidi ezingamatshumi amabili amadollar emelika yokuthuthukisa inotho yabasakhulayo.
UMnu. Saviour Kasukuwere umphathintambo wezabasakhulayo lokuthuthukisa inotho kazulu wethule umbiko lo egwalweni lwakhe lwe Facebook lapho athe imali le izaqalisa ukunikwa abayifunayo kusukela ngoMvulo ozayo.
UKasukuwere uthe abasakhulayo abaleminyaka engamatshumi amabili lanye kusiya kumatshumi amathathu lanhlanu bakhangelelwe ukuthi bathole imali le eStanbic.
Uthe abafuna imali le kumele bathole amaphepha afunakalayo ebhanga leli kanye lenhlanganiso yabasakhulayo engaphansi kogatsha lwakhe iNational Youth Council of Zimbabwe.
Umnu. Livingstone Dzikira umqondisi wenhlanganiso le uthi bonke abafuna ukuncediswa ukwenzela ukuthi bathole imali le kumele babathinte ngocingo kumbe baye emawofisini eYouth Council.
Ibhanga le Central African Building Society lilesikhwama esifanayo.
Umnu. Bhekilizwe Ndlovu ingcwethi kwezombusazwe uthe okuhluphayo yikuthi abasakhulayo bebandla le yibo kuphela abazathola imali le.
Ibhanga le Stanbic Selibumbe Isikhwama Sokuthuthukisa Inotho Yabasakhulayo: Kasukuwere
- Gibbs Dube
