Idale labampathintambo eleCabinet selivumelane ukuthi uhulumende kumele anike ngokutshetsha inkampani ye New Zimbabwe Steel Limited eyathengwa nyakenye yi Essar Africa Holdings konke okwenjiwayo okubanjwe yiNew Zimbabwe Minerals eyayisaziwa ngokuthi yi Buchwa Iron Mining Company.
Umphathintambo wezamafekithali uMnu. Welshman Ncube utshele iStudio 7 ngoLwesithathu ukuthi idale lithethe isinqumo lesi kulandela ukuhlupheka kwezisebenzi ze New Zimbabwe Steel ekade sezingasatholi iholo.
UNcube uthe uhulumende ukhangelelwe ukunika inkampani le yaMandiya okwenjiwayo lokhu ngesiphangiphangi ukwenzele ukuthi iqalise ukuvuselela iZimbabwe Iron and Steel Company eyadilikayo.
Uphinde wathi okwenjiwayo lokhu okubanjwe ngomunye wababesebenza eZiscosteel akusoze kuthintwe nguhulumende kuze kuthoniswe udaba lolu emthethwandaba.
Inkampani ye Essar ime ukubhadala izisebenzi iholo ngoMfumfu nyakenye, yanika izisebenzi iholo eliyingcosana kusungulwa umnyaka lo kwaze kwayafika uMabasa ikhala ngokuthi uhulumende uyephula isivumelwano sokuvuselela iZiscosteel.
Umnu. Obert Mpofu umphathintambo wezemigodi uthe loba idale le cabinet livumelane ukuthi iEssar Africa Holdings kumele iphiwe okwenjiwayo okubanjwe yi Buchwa Iron Mining Company, kumele isivumelwano lesi sihlolisiwe.
Umnu. Benjamin Moyo umgcinisihlalo wenhlanganiso yezisebenzi eNew Zimbabwe Steel uthi okwenziwa yiziphathamandla zikahulumende eZiscosteel kwephula inhliziyo.
Idale le Cabinet Livumelana Ukuthi Inkampani ye Essar Africa Sokumele Inikwe Okwenjiwayo Okuzavuselela iZiscosteel
- Gibbs Dube
