Umqondisi wenkampani yendizamtshina eye Air Zimbabwe uMnu. Innocent Mavhunga uthi abakaqalisi ukuphaphisa indizamtshina zayo kwele South Aafrica ngenxa yokwesabela ukuthi zinga banjelwa isikwelede senkampani ye Bid Air Services senkulungwane ezingamakhulu amahlanu zamadollar eMelika.
UMavhunga uthi akukafakwa isikhathi sokuthi indizamtshina lezi zingaqalisa nini ukuphaphela eSouth Africa. Kazange aphike imbiko ethi iAir Zimbabwe le Bid Air services seziyehlulekile ukuvumelana ngokuthi isikwelede lesi sibhadale njani.
Inkampani ye Bid Air Services ike yabamba indizamtshina ye Air Zimbabwe ekuqaliseni kuka Mpalakazi yaphinda yayibisela kubanikazi sokukhulunyiswana ngokubhadala isikwelede sokwehlisa impahla eOliver Tambo International Airport eJohannesburg.
Indizamtshina ye Air Zimbabwe yohlobo lwe Boeing 767 200 ike yabanjwa eBhilithane yinkampani ye American General Supplies ngenxa yokungabhadali isikwelede esedlula isigidi samadollar eMelika.
Indizamtshina le ekhululwe yi General Supplies ngoLwesibili iAir Zimbabwe isibhadele isikwelede sonke ibikwa yenelise ukuphindela eHarare ngeSonto.
Ingcwethi kwezenotho uMnu. Rejoice Ngwenya uthi sokumele uhulumende athengise inkampani ye Air Zimbabwe njengoba isiyangisa ilizwe.
