Inkampani yendizamtshina iFly Kumba isimile ukuphaphisa indizamtshina eZimbabwe le South Africa ingethulanga umbiko wokuthi ihlutshwa kuyini.
Inkampani le ebithengisa amatikiti alentengo ephansi kulenkampani ye Air Zimbabwe le South African Airways, ikhiphe umbiko kumaphephandaba wokuthi kayisoze yenze umsebenzi njengenhlalayenza kodwa ithembise ukuthi izahlawula imali yabantu akade kumele begade indizamtshina zayo.
Asenelisanga ukukhuluma labaqondisi benkampani le uMnu. Patrick Chapwanya lo Mnu. Lloyd Muchaka kanye lalabo abasemawofisini eSouth Africa le Zimbabwe ngoba akulamuntu owemukela incingo zabo.
Kukhanya izisebenzi ezedlula amatshumi amathathu kanye lalabo okade kumele besebenzise indizamtshina ye Fly Kumba bengazi ukuthi kuhamba njani.
Omunye walabo abalahlekelwe yimali nguNkosikazi Rebecca Spencer wako Bulawayo othi kaboni ethola amakhulu amabili amadola eMelika awasebenzisayo ethengela umntanakhe okwakumele asebenzise iFly Kumba esiye eGoli.
Ingcwethi kwezenotho uMnu. Bekithemba Mhlanga utshele iStudio 7 ukuthi okwenziwe yinkampani le kutshengisa ukuthi yehlulekile ukwenza imali yokuthi ithuthuke.
