Inkampani ye Guth South Africa engaphansi kwe Guth Ventiltechnik eye Germany ibikwa isiqalisile ukwakhela iGushungo Holdings inkampani enkulu emangweni we Zvimba eMashonaland West yokwetha amasi, ukulungisa i cheese kanye lolunye uchago olunambithayo.
Abakwaziyo ngalokhu kanye labezindaba bathi inkampani le yenza okungekho emthethweni njengoba ele Germany liphakathi kwenhlanganiso yamazwe awe Europe, eye European Union esekela izijeziso zenotho ezafakelwa inengi lenkokheli yebandla le Zanu PF.
Bathi iGuth South Africa yenza ihlazo ngokusekela iGushungo Holdings eka Mongameli Robert Mugabe lomkakhe uGrace Mugabe.
UMnu. Sabelo Ndlovu-Gatsheni ingcwethi ecubungula ezombusazwe utshele uGibbs Dube we Studio 7 ukuthi kunzima ukuba amazwe awe European Union anqabele amankampani ukuthi angasebenzelani labantu be Zimbabwe abangaphansi kwezijeziso zenotho.
