Izikolo ezizimele zodwa kanye lezinye ezikahulumende sezicele kugatsha lwezemfundo ukuthi ziphiwe imvumo yokhuphula imbhadalo yemfundo yama levies le fees ngomnyaka ozayo ngesilinganiso sokungamatshumi amane ekhulwini-40%.
Ezinye izikolo zikahulumende zibikwa zifuna ukukhuphula imbhadalo yabantwana abafunda emini ngamatshumi amabili amadollar eMelika, okutsho ukuthi labo akade bebhadala ikhulu lamatshumi ayisithupha amadollar sebezabhadala ikhulu lamatshumi athoba minwe mibili ngethemu.
Abafunda behlala ezikolo lemakolitshini ezifundo ze secondary balakho ukubhadala imali ekhuphuke ngamatshumi amabili lanhlanu amadollar eMelika. Okwamanje abantwana abanengi babhadala amakhulu phose amane amadollar eMelika-US$370 kusiya kumakhulu phose ayisithupha-US$560 ngethemu.
Labo abafunda ezikolo ezizimeleyo imbhadalo yemfundo ilakho ukukhuphuka ifike kumadollar phose angamakhulu amane - US$395 ngethemu.
Umnu. David Coltart umphathintambo wezemfundo uthi lobanje engakezwa ngezikolo ezifuna ukukhuphula imbhadalo yezifundo, kujayelekile ukuthi izikolo ziqalise ukucela imvumo yokukhuphula limbhadalo ngalesisikhathi somnyaka.
UColtart uthi abazali labaphathi bezikolo kumele bavumelane ngesilinganiso sokukhweza ngaso limbhadalo andubana bethulele uhulumende.
Unkosikazi Mercy Sibanda utshele iStudio 7 ukuthi abazali abanengi bangeke benelise ukubhadala imali efunwa yizikolo ngenxa yokuthi bavele bethwele nzima ngokubhadala leyomali efunakalayo okwamanje.
Umnu. Ambrose Sibindi owake wabangumgcinisihlalo we Cyrene Mission Parents Teachers Assocaition uthi akumelanga kukhuphulwe imbadalo yemfundo ngenxa yokuthi abazali bathwele nzima ngokuswelakala kwemali.
