Izisebenzi zohlangothi olubuthanisa imali yemithelo olwe Zimbabwe Revenue Authority (ZIMRA) zibikwa zisethekelela izikolo ezitshiyeneyo lapho ezifika zitshele ababalisi ukuthi kumele babhadale umthelo we tax kulokho abakuphiwa ngabazali bebabonga ngomsebenzi abawenzayo.
Ababalisi babikwa bethukuthele okwamagama ngalokhu osokwenze ukuthi bacele ugatsha lwezemfundo ukuthi lumise lokhu okwenziwa yiZIMRA efuna ukuthi imali le ibhadalwe kusukela ngesikhathi bethola abakunikwa ngabazali.
Umphathintambo wezemfundo uMnu. David Coltart uthi kabikelwanga ukuthi iZIMRA isidinga imithelo kubabalisi ngakho-ke kumele iphumele egcekeni ukuthi ikwenzelani lokhu.
Umsekeli womqondisi we Progressive Teachers Union of Zimbabwe uNkosazana Nokuthula Hlabangana uthi akulunganga okwenziwa yi ZIMRA.