Umongameli Robert Mugabe uthi kuyadanisa ukuthi ugatsha lukahulumende lwezemali alukakhiphi imali yokuvuselela amafekithali akoBulawayo adilizwa yikuswelakala kwemali.
Kubikwa ukuthi uMongameli Mugabe utshele labo akade bemhlangabeza emagcekeni endizamtshina iJoshua Mqabuko Nkomo International Airport koBulawayo ukuthi okwenziwa lugatsha lwezemali kubisela muva uhlelo lokuvuselela amafekithali olwe Distressed and Marginalized Areas Fund eyasungulwa nyakenye.
Umongameli Mugabe uthi kumele kusetshenziswe imali etholakala ekwembiweni amadayimana lokunye okutshiyeneyo ukwenzela ukuthi kuvuselelwe amafekithali la athwele nzima.
Uthe okudanisayo yikuthi zinengi izisebenzi esezalahlekelwa ngumsebenzi iziphathamandla zikahulumende zilokhe zilwisana ngemali yokuvuselela amafekithali koBulawayo.
Kusenjalo, uMnu. Welshman Ncube umphathintambo kahulumende wezamafekithali uthi ugatsha lwezimali lukhiphe izigidi ezilitshumi amadollar eMelika ngeviki ephelileyo ezasetshenziswa ukubumba isikhwama sokuvuselela amafekithali.
Inkampani ye Old Mutual Insurance isifake izigidi ezingamatshumi amabili amadollar eMelika ekubumbeni isikhwama lesi esesincede amankampani amatshumi ngezigidi ezintathu zamadollar eMelika.
Umnu. Percy Mcijo umqondisi we ZCTU kwelemandebeleni uthi kuyadanisa kakhulu ukuthi iziphathamandla zikahulumende zilwisana okwamagama ngemali yokuvuselela amafekithali ngesikhathi amankampani edilika koBulawayo.
Kuyadanisa Ukuthi Imali Yokuvuselela Amafekithali koBulawayo Ayikakhitshwa Nguhulumende: Mugabe
- Gibbs Dube