Inhlanganiso ebona ngokwenjiwayo emhlabeni wonke jikelele eye Frazer Institute ithi osomabhizimusi abanengi bathi bayehluleka ukuvula ibhizimusi yemigodi eZimbabwe ngenxa yokulwisana kwamabandla abusayo.
Inhlanganiso le esanda kwethula ugwalo lwayo lomnyaka ka 2011 ithi okunye njalo okwenza osomabhizimusi bengafaki imali yabo kwezemigodi eZimbabwe yikuthi lemithetho ekhona enjengowokwabela uzulu amashares amankampani emazweni kayilandelwa ngemfanelo.
Iphinde yathi osomabhizimusi laba bacabanga ukuthi bangathathelwa amankampani abo njengalokho okwenzakala kwabamhlophe abahluthunelwa amapulazi libandla le Zanu-PF.
Inhlanganiso ye Frazer Institute ithi abaqondisi bamankampani labadinga okwenjiwayo beqhatshwe ngamankampani bethule imicabango yabo leyi bekhululekile ekulotshweni kogwalo lwenhlolisiso lolu olubizwa ngokuthi yi ‘Annual Survey of Mining Companies’.
Baphinde basola njalo imithelo yezemigodi eminengi kwele Zimbabwe.
Inhlanganiso yabemba okutshiyeneyo iZimbabwe Chamber of Mmines isanda kusola imithelo ekhuphukileyo eyethulwe nguhulumende lonyaka.
Umnu. Nkululeko Sibanda ingcwethi kwezombusazwe uthi kunengi okwethusa osomabhizimusi bemazweni abafuna ukuvula amafekithali lemigodi kwele Zimbabwe.
