Amalungiselelo okulima lonyaka asefike kuzinga eliphezulu njengoba abalimi emaphandleni sebeqalisile ukubiya insimu lokudinga inhlanyelo lokunye okutshiyeneyo.
Abalimi abaseVictoria Falls, Mutare, Masvingo, Gwanda leGoromonzi batshele iStudio 7 ukuthi okungabahlupha lonyaka yikuthola imali yokuthenga okufunakalayo okunjengenhlanyelo lemvundiso yefertilizer.
Inengi yabo bathi sebeqalisile ukudinga imvundiso ezibayeni langaphansi kwezihlahla ukwenzela ukuthi bayisebenzise ukwendlalela ihlanyeyo.
Bathi kababoni bethola imali emabhanga yokulimisa njengoba amabhanga amanengi engathi incwadi ezitshengisa ukuthi amapulazi ngawabo.
Incwadi lezi ezibizwa ngokuthi ngama 99-year land leases zisahlolisiswa ngamabhanga lohulumende ukwenzela ukuthi zisetshenziswe yilabo abafuna ukuthola izikwelede.
Ingcwethi zithi akwenzakali ukuthi amabhanga azathatha ingcwalo lezi njengoba abalimi abanengi behluleka ukubhadala izikwelede zeAgribank ngemnyaka esanda kwedlula.
Sixoxe lomlimi weGoromonzi uMnu. Herbert Sithole otshele iStudio 7 ukuthi kukhangelelwe ukuthi abalimi bazatshaya inala lonyaka.
Kasenelisanga ukukhuluma ngodaba lolu loMnu. Joseph Made umphathintambo wezokulima okade engaphenduli umakhalekhuhwini wakhe.