Ugatsha lukahulumende olubona ngezabatsha lokuthuthukisa inotho yabensundu solufuna ukusungula uhlelo lwabatsha oluzaqalisa ezikolo zabantwana abasema creche.
Ugatsha lolu solulobe ugwalo lweziqondiso zaloluhlelo olutshengisa ukuthi abantwanyana kumele bafundiswe ngokuqakatheka kwe flag ye Zimbabwe, iNational Anthem kanye lemigido yendulo.
Asebebone lolugwalo bathi ugatsha lolu luthi uhlelo kumele luqalise ngenyanga ezayo njalo luyabe lukhangelwe ngabameli balolugatsha lalabo abafundiswa ezikolweni zabasakhulayo abakuma ward.
Ugatsha lolu luthi kumele abasakhulayo abazinkulungwane ezintathu bangene ezifundweni lezi ezikolo lemakolitshini ngomnyaka.
Abantwana abaku primary le secondary school babikwa bemele benze okuqinisa umzimba njengalokho okwenziwa ngamasotsha nxa elolwa.
Loba umphathintambo wezabatsha uMnu. Saviour Kasukuwere siyehluleke ukukhuluma laye, umphathintambo wezemfundo uMnu. David Coltart uthe loluhlelo lungeke lwavunyelwa ezikolo.
Kusenjalo, umqondisi we Zimbabwe Liberators Peace Initiative Trust uMnu. Max Mnkandla uthi loluhlelo lwenziwa yi Zanu PF esiphelelwe ngumpako kwezombusazwe.