Ugatsha olubona ngezamandla omlilo otshiyeneyo luthi solunike amankampani amahlanu imvumo yokuvula amafekithali okuphehla umlilo kagetsi.
Umphathintambo walolugatsha uMnu. Elton Mangoma uthi amankampani la aseqalisile ukulungiselela ukuvula amafekithali okuphehla ugetsi ozasetshenziswa ngamankampani labantu makhaza.
Uthi amankampani la yi Tsengwa Power Station ye RiZim (Pvt) Limited, iLusulu Power Plant eye Pan-African Energy Company, iGayirezi Mini-hydro Power, iPungwe Mini-hydro Plant kanye le Mutirikwi Mini-hydro Plant ezilabo somabhizimusi be Zimbabwe abatshiyeneyo.
Uphinde wathi iTsengwa ikhangelelwe ukuthi ingaqalisa ukuphehla ugetsi ekupheleni kwalumnyaka.
Amanye la akhangelelwe ukuthi aqalise ukusebenza okuqotho ekupheleni komnyaka ozayo kusiya kumnyaka ka 2014.
Amankampani la alakho ukuncintisana le Zimbabwe Electricity Supply Authority eyehluleka ukutholisa uzulu ugetsi owaneleyo.
Isikhulumeli se Bulawayo Progressive Residents Association uMnu. Roderick Fayayo uthi kuyajabulisa ukuthi sokulamankampani asengene ekuphehleni umlilo kagetsi ezimele wodwa.
