Ugatsha lwebhanga elikhulu lelizwe ele Reserve Bank of Zimbabwe olukhangelane ngokusetshenziswa kwemali lubikwa luzahlala phansi loMnu. Oobert Mpofu, umphathintambo wezemigodi, kunsukwana ezilandelayo lucubungula umthambo wemali yakhe.
Ugatsha lolu lubikwa soluthole okutshiyeneyo ngendlela uMnu. Mpofu azuza ngayo imali kusukela ngeviki ephelileyo lapho okwaqaliswa ukuhlolisisa inotho yakhe.
IStudio 7 kayenelisanga ukukhuluma loMnu. Mpofu owaziwa ukuthi ulenotho enengi ikakhulu kweleMandebeleni lapho alepulazi elilenkomo ezidlana uboya, izitolo ezimbalwa kanye lesitezi sokwenzela amabhizimusi iYork House.
Abaqondisi be RBZ bacele ugatsha lolu ukuthi lucubungule uMnu. Mpofu esanda kuthenga ibhanga le Zimbabwe Allied Banking Group ngezigidi ezilitshumi zamadollar eMelika.
Ibhanga leli belisehluleka ukuthola izigidi ezilitshumi lambili zamadollar eMelika yokuyithuthukisa.
Umnu. Masimba Kuchera ingcwethi kwezenotho uthi ugwalo oluzethulwa ngabaqondisi be RBZ lulakho ukungavezelwa uzulu.
