Kuqhubekela phambili ukuxabana kukaMnu. Gideon Gono usibalukhulu webhanga le Reserve Bank of Zimbabwe loMnu. Saviour Kasukuwere, umphathintambo wezokuthuthukisa inotho kazulu, ngokwabelana amashares amabhanga emazweni asebenzela kwele Zimbabwe.
Lokhu kulandela umbiko owethulwe nguMnu. Kasukuwere ngeviki ephelileyo othi amabhanga kumele aqalise ukwabela uzulu amashares ayisilinganiso sokungamatshumi amahlanu lanye ekhulwini – 51%.
Lokhu kucaphule uGono ocine esithi uKasukuwere akumelanga alokothe akhulume ngamabhanga njengoba engomunye wabantu abala amashares kubhanga le Genesis Investment Bank elacina livalwa ngenxa yokwehluleka ukuqhuba umsebenzi ngemfanelo.
UGono uphinde wathi okwethulwe nguKasukuwere akumelanga kulandelwe ngamabhanga anjenge Standard, Stanbic le Barclays.
UKasukuwere ubikwa ecaphulwe okwamagama ngamazwi kaGono wathi lokhu yikukhuluma komuntu ozwakala etshaywa ngumoya emazweni. Okwamanje uGono ubikwa engekho kwele Zimbabwe.
Umnu. Psychology Maziwisa okugatsha lukahulumende lwabatsha lokuthuthukisa inotho kazulu utshele iStudio 7 ukuthi uhlelo lolu luzaqhubekela phambili loba nje uGono engavumelani loKasukuwere.
Kodwa-ke uNkosikazi Dorcas Sibanda okukomithi ebona ngokusetshenziswa kwemali kahulumende uthe ukulwa kuka Gono loKasukuwere kubisela muva inhlelo zokuthuthukisa inotho yelizwe.
