Umhlangano omkhulu wokuhuga abamabhizimusi ukuba basungule amafekithali elizweni owe Zimbabwe Investment Conference ugqitshwe ngoLwesithathu eHarare uhulumende etshaya ukhwelo kubosomabhizimusi baphandle kwelizwe ukuba bezosebenzelana lozulu wakuleli emisebenzini yokuthuthukisa isizwe.
Umphathintambo Wezomnotho UMnumzana Tapiwa Mashakada utshele iStudio 7 ukuthi lumhlangano uqhutshwe kahle njalo ilizwe selikhangelele ukuthi amankampani emazweni aqalise ukuvula amafekithali eZimbabwe.
UMashakada uthe osomabhizimusi abanengi bemazweni batshengise amadlabuzani wokuthi bengavula amabhizimusi eZimbabwe.
Kunjalo nje, umhlangano wezenotho lo uthe uphela ngoLwesithathu eHarare iZANU-PF Politburo ibisenza umhlangano wokubumba amacebo wokujezisa amankampani aseZimbabwe awemazweni afakela uMongameli Robert Mugabe labanye bakhe izijeziso zenotho.
Uumhlangano lo ubikwa uthethe isinqumo sokuthi kumele ukwabelana kwamashares kuhlelo lwe Indigenization luqalise kumankampani ezemgodi awe Bhilithane le Melika.
Ingcwethi kwezenotho uMnu. Masimba Kuchera uthe lokhu kuyethusa njengoba kwenziwa ngesikhathi kube lomhlangano omkhulu wokuvuselela inotho yelizwe.
