Uzulu we Zimbabwe usebhekane lodubo olukhulu lokuswelakala kwemali emabhanga ngesikhathi imuli ezinengi zikhangelele ukusebenzisa leyo mali ngekhefu leKhisimusi.
Abantu makhaza babikwa sebelala phandle kwamabhanga lapho abaphiwa amaphetshana alenombolo zokuthi babe lemvumo yokungena emabhanga baphiwe imali yabo nxa ikhona.
Isakhamuzi se Gutu uNkosikazi Nelly Ruwocha utshele iStudio 7 ukuthi inengi labantu abaseduzane lamadolobho amancane kanye lama Growth Points kabenelisi ukuthola imali yabo emabhanga abanengi abalisa oPost Office Savings Bank (POSB) kanye le CABS.
Izakhamuzi zako Bulawayo le Masvingo zithi lolu hlupho lwenza ukuthi abantu bahlale phandle kwamabhanga bemelele ukuthola imali yakwele Melika kumbe amaRand eSouth Africa.
Izakhamizi lezi zithi kungenzakala ukuthi zingatholi imali kuze kudlule iKhisimusi.
Abantu abanengi babikwa besehluleka lokwethekelela izihlobo ngenxa yokuswelakala kwemali.
Ingcwethi zenotho zithi ukuswelakala kwemali kwenziwa yikuthi abantu abanengi badinga imali yabo emabhanga ngobunengi babo kanti-ke amanye amabhanga alabantu abanengi kakhulu ngakho-ke azange akunakane lokhu bevulisa abantu amabhuku ebhanga.
Isisebenzi selinye ibhanga lakoBulawayo uMnu. Samson Nhliziyo utshele iStudio 7 ukuthi ukuswelakala kwemali emabhanga atshiyeneyo sokudanise uzulu.
