Inhlanganiso yezifundi eyeZimbabwe National Students’ Union isithethe isinqumo sokuthi kumele zonke izifundi ezingamantombazana zicebe kuhulumende nxa zibanjwa ngamandla ukuthi ziye emacansini labazifundisayo.
Isinqumo lesi sithethwe emhlanganweni wohlangothi lweZINASU olukhangelane labesifazane owenziwe lamuhla edolobheni leHarare.
UNkosazana Joana Mamombe unobhala jikelele wohlangothi lolu utshele iStudio 7 ukuthi sokumemetheka ngamandla ukubanjwa kwamantombazana emakolitshini ngabafundisayo ukwenzela ukuthi aphiwe imiklomelo yezifundo.
UNkosazana Mamombe uthe amantombazana athwele nzima ngalokhu njengoba engancedwa yiziphathamandla zamakolitshi nxa engabika ngokubehlelayo.
UNkosazana Mamombe uthi baphinde bahlafuna ngenhlupho ezinengi emhlangangweni lo ezibhekwe yizifundi ezingamantombazana emakolitshini ezinjengokuswela indawo yokuhlala lemali yokubhadalela izifundo.
Umhlangano lo uphinde wahlafuna njalo udaba lwesicoco seDoctor of Philosophy esisanda kutholwa ngoNkosikazi Grace Mugabe.
Sixoxe loNkosazana Rhodeline Dewa umsekeli womqondisi weZINASU eBulawayo Polytechnic otshele uGibbs Dube weStudio 7 ukuthi sokunganeno ukubanjwa ngamandla kwezifundi ezingamantombazana kulelokolitshi ngabazifundisayo.