Inhlanganiso emele izisebenzi iZimbabwe Congress of Trade Unions (ZCTU) ithi abaqhatshi abanengi lonyaka bathi kabasoze benelise ukukhuphula iholo lezisebenzi ngenxa yokuthi kabenelisi ukulungisa impahla yokuthengisa engabalethela inzuzo ethe xaxa .
Umsekeli kanobhala jikelele we ZCTU uMnu. Japhet Moyo uthi abanye abaqhatshi bathi balakho ukukhuphula iholo lezisebenzi ngoMpandula ngamadola alitshumi kuphela.
UMoyo uthi lokhu sokudale ukufuthelana lengxabano phakathi kwabaqhatshi lezisebenzi ezifuna iholo elinganeno elingenza ukuba ziphile lazo impilo engcono.
Ukuxokozela lokhu kubuya ngesikhathi iNational Incomes and Pricing Commission isithi intengo yemphahla eZimbabwe iqonge okwamagama kusukela ngoMpalakazi kuze kuyefika phakathi kuka Nhlolanja.
UMoyo uthi lokhu kuyethusa ngoba izisebenzi ezinengi zizakudla ingqweqwe zomlomo lonyaka nxa iholo lingakhuphulwanga ngabaqhatshi.
