Abaqondisi bamankampani emigodi okuthiwa asehluthenelwe nguhulumende we Zimbabwe amashares ayisilinganiso sokungamatshumi amahlanu lanye ekhulwini, bathi bazakhulumisana leziphathamandla zikahulumende ngaloludaba ngeviki ezayo.
Abaqondisi laba abangafunanga ukuqanjwa ngamagama bathe umbiko owethulwe nguMnu. Saviour Kasukuwere umphathintambo wezokuthuthukisa inotho kazulu uyabethusa njengoba iZimbabwe ilemithetho engavumeli ukuthi kuhluthunwe amankampani emazweni.
Bathi kabavumelani lendlela uhlelo lolu oluqhutshwa ngalo libandla likaMongameli Robert Mugabe elikuhulumende womnyano.
Abaqondisi laba bakhangelele ukuthi zizaphumelela inkulumo abazazenza loKasukuwere obike ukuthi amankampani la sokumele anike uhulumende abakuzuzayo nxa besemba okutshiyeneyo okuhambelana lamashares asethethwe lilizwe.
Umnu. Buletsi Nyathi okunhlanganiso ye Youth in Mining Council of Zimbabwe uthe izinqumo ezethulwe nguKasukuwere zingaguqulwa ngamabandla abusayo lenhlanganiso yeSouthern African Development Community.
Umnu. Nhlanhla Dube isikhulumeli sebandla le Movement for Democratic Change elikhokhelwa nguMnu. Welshman Ncube uthi abaqondisi bamankampani emigodi abanjelwe amashares kumele bahlangane leziphathamandla zikahulumende womanyano.
