Amankampani amabili akwele China le South Africa asebenza lezizalwane ze Zimbabwe aselungiselela ukuvula imigodi ye platinum eChegutu le Ngezi.
Umsekeli womphathintambo wezemigodi uMnu. Gift Chimanikire uthi amankampani la aseqalisile ukuthwala imitshina yokwemba iplatinum evela kulawo mazwe.
UChimanikire ongatshongo ukuthi lamankampani aletha inotho enganani eZimbabwe uthi ukuza kwawo akwephuli iziqondiso zomthetho we Indigenization njengoba ebambisana lenzalo ye Zimbabwe.
Uphinde wathi iHuwanoi yakwele China le Amari Resources ye South Africa akhangelelwe ukuthi athuthukise izabelo lapho azabe esemba khona iplatinum.
Kodwa-ke ingcwethi kwezenotho zithi amankampani eChina kawathenjwa njengoba edlelana lebandla le Zanu PF.
Eyinye yalezingcwethi uMnu. Walter Nsungunguli Mbongolwane uthi amankampani eChina atshontsha inotho ye Zimbabwe.
Eyinye njalo ingcwethi kwezenotho uMnu. Bekithemba Mhlanga uthi uzulu usekhathele ngamankampani eChina.
