Amapholisa eBhilithani asehlolisisa inhlanganiso yeGirl Child Network ekhokhelwa nguNkosazana Betty Makoni, ongomunye wamaqhawe alonyaka eCable News Network (CNN), ecatshangelwa ukuthi yaqambula imali ebuthaniswe ukwelaphisa u Taremedzwa Mapungwana.
Unkosikazi Priscilla Nyathi omunye wababumba inhlanganiso le uthi bamangalelwe emapholiseni ngabantu abaphandele uTaremedzwa imali yokuthi ayehlinzwa eBhilithani ithumba elaselibhibhidla.
Unkosikazi Nyathi utshele uGibbs Dube we Studio 7 ukuthi lanxa amapholisa awe Essex kanye lalawo akhangelane lezokweba engakakhulumi laye ngodaba lolu abikwa elesifiso sokudingisisa ukuthi zonke imali ezikhitshwe ngabantu lamankampani zasetshenziswa njani.
Inhlanganiso le ibikwa yenelisa ukuthola amadollar eMelika azinkulungwane ezingamatshumi amabili lambili eZimbabwe eyavela ebantwini makhaza lakumankampani anjenge Econet Wireless le Standard Chartered Bank.
Kwathi-ke eBhilithani kwatholakala amampondo alitshumi lanhlanu.
Unkosikazi Nyathi uthi phakathi kwemali eyavela eZimbabwe kwasetshenziswa impondo eziyinkulungwane lesitshiyangalombili okutsho ukuthi limali ingabe yaqanjulwa.
Uphinde wathi imali ebuthaniswe eBhilithani layo iyahlolisiswa ngamapholisa njengoba kucatshangelwa ukuthi eyinye yayo ingabe yatshontshwa.
Unkosikazi Barbara Nyagomo Mambo, omunye walabo abancedise kakhulu ukudingela Taremedzwa imali yokumelaphisa, uthi umangalele iGirl Child Network emapholiseni njengoba abantu abanengi besebekhonona ngendlela engakhanyiyo ukuthi limali efakwe esiphaleni soncedo se Girl Child Network.
Unkosikazi Nyathi uthe isibhedlela se St. Bartholomeuw eBhilithani esahlinza ithumba lika Taremedzwa sihlawulwe impondo ezizinkulungwane ezilitshumi lambili.