IZimbabwe isithole amazwe phose angamatshumi ayisitshiyangalo mbili asekelana layo ekuphikiseni inyathelo lenhlanganiso ebona ngezempilakahle emhlabeni jikelele eye World Health Organization (WHO) lokudinga ukuvimba ukuthengiswa kwegwayi elifakwe ezinye izinto zokuthi linambitheke.
Amazwe aseluhlwini oluthiwa yi African, Caribbean le Pacific region abikwa esekhwaze kwazwakala emhlanganweni ose Uruguay lapho iWHO ekhangelelwe ukwethula isinqumo sokuthi igwayi lingafakwa okwenza linambitheke ngoba lokhu kudala imikhuhlani njalo likhanga abasakhulayo abacina sebelithakazalela.
Amazwe la athi akumelanga isinqumo lesi sithathwe njengoba igwayi liyilo elimise inotho yawo.
UMnu. Edward Mkhosi okukhomidi yedale lephalamende ekhangelane lezokulima utshele uGibbs Dube we Studio 7 ukuthi kuyabukeka okwenziwa ngamazwe avimba iWHO ukuthi ithathe lesisinqumo kuliviki.
