Uhulumende we South Africa, inhlanganiso zamabhizimusi kanye lezezisebenzi sebevumelene ukuthi sokumele kuthengwe impahla lokunye okutshiyeneyo ezakulelo lizwe kungakakhangelwa ezilethwa ngamankampani amanye amazwe.
Uhulumende ubikwa elobelane isivumelwano lenhlanganiso lezi esibizwa ngokuthi yi Local Procurement Accord esizakwenza kube nzima ukuthi amankampani eZimbabwe athunga izigqoko lezicathulo kanye lalungisa amaphilisi, utshinda legwayi athengisele impahla kwele South Africa.
Isivumelwano lesi sikhangelelwe ukuthi sibe ngumthetho oqinileyo ngenyanga ezayo iPreferential Procurement Policy Framework Act.
Ele South Africa lilobudlelwano obukhulu bokuthengiselana impahla etshiyeneyo le Zimbabwe okwenza ukuthi umthetho lo wesatshwe ngamankampani amanengi loba nje emalutshwana okwamanje athengisela lelo lizwe impahla.
Ele Zimbabwe lithengisele ele South Africa impahla edlula isigidi samadola eMelika ngomnyaka ophelileyo. Ngesikhathi esifanayo ele South Africa lathengisela iZimbabwe impahla ebiza izigidi ezilitshumi lanhlanu zamadollar eMelika.
Umnu. Bulisane Ncube umgcinisihlalo we Zimbabwe National Chamber of Commerce eMandebeleni uthi okwamanje sokudingeka ukuthi uhulumende we Zimbabwe abumbe umthetho ozakhuthaza ukuthengwa kwempahla ye Zimbabwe kungakadingwa eyemazweni.
