Ingcwethi kwezenotho zithi ibandla le ZANU PF lilakho ukungethuleli iTreasury imali etholwa ekwenjiweni amadayimana eMarange okumele ibhadale iholo elikhuphukileyo lezisebenzi ukwenzela ukubhidliza uhulumende womanyano.
Ingcwethi lezi zitshele iStudio 7 ukuthi njengoba kungaziwa ukuthi kutholwa imali enganani ekwenjiweni amadayimana, ibandla le ZANU PF eliyilo eliphethe isikhwama semali yamadayimana lingahlukuluza umphathintambo wezemali uMnu. Tendai Biti ngokwala le mali le.
Zithi lokhu kungenza ukuthi uMnu. Biti acine sebhadala izisebenzi zikahulumende iholo eliphansi njengoba kuyabe sokungasela mali yokubhadala iholo elikhuphukileyo.
Ingcwethi lezi zithi lokhu kungenza ukuthi uMnu. Biti alwe okwamagama lezisebenzi kumbe azonde ibandla lakhe lize liphume kuhulumende womanyano.
Eyinye yalezi ngcwethi uMnu. Daniel Ndlela uthi nxa imali etholwa ekwenjiweni amadayimama ingaphathwa kahle izisebenzi zingathola iholo elikhuphukileyo kuze kuyephela umnyaka.
