Umphathintambo wezamafekithali uMnu. Welshman Ncube uthi akusoze kwenzakale ukuthi ibandla le Zanu PF liqalise ukuthatha ngodlakela amafekithali abamhlophe abafakela ibandla leli izijeziso zenotho.
UNcube uthi inhlelo zonke ezisungulwa eZimbabwe kumele zivunyelwane ngamabandla akuhulumende womanyano.
Uthi okukhulunywa nguMongameli Robert Mugabe ngumbono wakhe ongeke walandelwa nguhulumende njengoba kulemthetho engavumeli ukuthi impahla yomuntu ithathwe mahlayana.
UMugabe usanda kutshela abalandeli bebandla lakhe ukuthi sokumele bephindisele kulabo abala ukwesula izijeziso zenotho.
UNcube uthi amabandla abusayo angeke avumelane ukuthatha ngodlakela amafekithali abamhlophe.
