Umphathintambo wezemali uMnu. Tendai Biti uthi kulengatsha zikahulumende ezedlula amatshumi ayisikhombisa ezicatshangelwa ukuthi kazisebenzisi ngemfanelo imali eziyibuthanisayo evela kuzulu nxa ehlawulela uncedo olutshiyeneyo aluthola kuhulumende.
UBiti uthi ingatsha lezi ziyavunyelwa ngomthetho ukuthi eyinye yemali kumbe yonke ehlawulwa nguzulu nxa ethatha amapassports, ehlawulela izigwebo zomthethwandaba kumbe ebhalisa ukubumba amankampani.
Uthi ingatsha ezinjenge wofisi ka Registrar-General sezileminyaka eyisikhombisa zingahlolisiswa ukubuthaniswa lokusetshenziswa kwemali le.
Ngakho-ke uBiti uthi kumele ingatsha zonke lezi zihambise ingwalo ezijulileyo kuhlangothi olubona ngokuhlolisiswa kokusetshenziswa kwemali kahulumende eka Comptroller Auditor General.
UBiti uthi lokhu kumele kwenzakale ekupheleni kuka Nhlolanja ngomnyaka ozayo.
Ingcwethi kwezenotho uMnu. Walter Nsununguli Mbongolwane uthi kumele uhulumende aqhatshe amankampani azimeleyo ukuthi ahlolisise ukusetshenziswa kwemali ezibuthaniswa nguhulumende njengoba izisebenzi ezinengi ezenza lumsebenzi sezatshiya uhulumende.
