Inhlanganiso ezizimeleyo zithi iWorld Bank, International Monetary Fund lamanye amabhanga akweledisa iZimbabwe imali esifika ku US$7 billion okwamanje, kumele ahlolisise ukuthi imali eyabolekwayo yasetshenziswa njani njengoba eyinye ikhanya yafakwa kunhlelo zokuncindezela uzulu libandla le ZANU PF.
UMnu. Tor Olsen omele inhlanganiso yeEurope Network eZimbabwe uthi sebebambisana lezinye inhlanganiso ezinjenge Jubilee Debt Campaign Coalition le European Network on Debt and Development ekuzameni ukuthi amabhanga la ahlolisise ngokusetshenziswa kwemali eyabolekwa ele Zimbabwe.
Umnu. Olsen uthi ezinye izigidi ezedlula amakhulu amathathu lamatshumi amabili amadola eMelika eyakweledwa kwele Bhilithane ikhanya yasetshenziswa ukuthenga imota zamapholisa le ndizamtshina zamasotsha.
Uthi eyinye njalo kusobala ukuthi yasetshenziswa ukuhlanyela izihlahla lokuthenga amafutha ezimota ngesikhathi sokhetho.
Ingcwethi kwezenotho uMnu. Eric Bloch uthi kunzima ukuthi yonke imali eyakweledwa yi Zimbabwe ibonakale ukuthi yasetshenziswa njani kusukela ngesikhathi sama 1990s nxa uhulumende angayala ukuthi kuhlolisiswe wonke amabhuku emali.
Eyinye njalo ingcwethi kwezenotho uMnu. Bekithemba Mhlanga uthi inhlanganiso ezizimeleyo seziswele okokwenza njengoba zichitha isikhathi zikhangelana lokwenzakala kudala okungasoze kulethele uzulu inzuzo.
