Inhloko kahulumende uMnu. Morgan Tsvangirai ukhangelelwe ukusukuma elizweni ngolweSihlanu elubhekise kwele China ukuyahlangana lenkokheli yalelo lizwe kanye labosomabhizimusi.
Loluhambo lusolwa kakhulu libandla le Zanu PF lezinye ingcwethi zenotho. Abasola loluhambo bathi iqula likaMnu. Tsvangirai likhulu kakhulu ngoba lilabantu abedlula amatshumi amathathu- 31 abale ndleko ebhadalelwa nguhulumende.
Kodwa uMnu. Luke Tamborinyoka isikhulumeli sikaTsvangirai uthi kuzahamba abantu abalitshumi lanye abavela kungatsha ezitshiyeneyo zikahulumende.
Iziphathamandle zikahulumende ezizabambisana indlela loMnu. Tsvangirai nguMnu. Gorden Moyo umphathintambo wamankampani kahulumende lo Mnu. Samuel Siphepha Nkomo obona ngezamanzi.
Ingcwethi kwezenotho uMnu. Tony Hawkins njalo engumbalisi ofundisa ekholitshini leBusiness School eye University of Zimbabwe uthi uhambo lolu lulakho ukuthuthukisa ubudlelwano beZimbabwe le China lobanje uTsvangirai ehamba labantu abanengi kulelo lizwe.
Umnu. Tsvangirai ukhangelelwe ukuthi uzakwenza umhlangano omkhulu labosomabhizimusi kwele China njalo ahambe embukisweni we China International Fair on Trade and Services.
UGibbs Dube oweStudio 7 uxoxe loNkomo othi uhambo lolu lulakho ukuthuthukisa inotho kazulu.
UGibbs uphinde waxoxa njalo loMnu. Masimba Kuchera ingcwethi kwezenotho njalo okunhlanganiso ye Zimbabwe Coalition on Debt and Development othi bekungamelanga ukuthi uTsvangirai ahambe kwele China lequla elilabantu abanengi kangako.