Inhloko kahulumende uMnu. Morgan Tsvangirai ubikwa eselobole isithandwa sakhe uNkosazana Locadia Tembo ngenkulungwane ezedlula amatshumi amathathu zamadollar eMelika lenkomo ezilitshumi.
UTsvangirai ubikwa ebhadale amalobolo ngoMvulo ntambama kwabozala eMazowe lapho aphinde acela umtshado.
Isihlobo somfazi uNkosikazi Biata Beatrice Nyamupinga omele iGoromonzi West edale lephalamende ekubandla le ZANU PF utshele iStudio 7 ukuthi uTsvangirai wenze konke okufunwa yimuli yangako Locadia ngakho imuli zombili sezimelele umtshado.
Uthe ilanga lomtshado lizakwethulelwa uzulu ngesikhatshana loba nje isikhulumeli senhloko kahulumende uMnu. Luke Tamborinyoka elokhe esemba phansi esithi uTsvangirai akalobolanga muntu.
UTsvangirai ubikwa njalo ethenge ezifela emlonyeni amagocery afike agcwala indlu yonke.
Unkosazana Locadia uthetshulwe yingwe eVictoria Falls ngomnyaka ka 1972 wafunda eQueen Elizabeth High School eHarare wasevula ibhizimusi yakhe yokuthengisa impahla eZimbabwe lakwele South Africa eseqede izifundo zamabhizimusi eSpeciss College.
UTsvangirai ngoMbimbitho ubikwa ebhadale isivala mlomo kuntombazana wako Bulawayo uNkosazana Loreta Nyathi othi wamzalisa umntwana owaziwa ngokuthi ngu Ethan.
Umnu. Phathisa Nyathi ingcwethi kwezamasiko esintu uthi okwenziwe nguMnu. Tsvangirai kuyabukeka ngoba uselemnyaka embili wafelwa ngumkakhe uNkosikazi Susan Tsvangirai owafela engozini yomgwaqo.