Abasekeli bebandla le Zanu PF, inkokheli yebutho le Zimbabwe Defense Forces, amapholisa kanye le Central Intelligence Organization (CIO) bathi abasoze bavume ukuthi uhulumende womanyano ahlolisise ukuthi balamapulazi amangaki lokuthi benzani kulawo mapulazi.
Lokhu kubikwa kuphume emhlanganweni weZanu PF omkhulu owe Congress osanda kwenziwa eHarare. Inkokheli yaleli bandla ibikwa itshelwe ukuthi abasoze bavume ukuthi uhulumende womanyano ahlolisise udaba lokwabiwa kutsha komhlabathi.
Inkokheli yebutho ithi izathatha amanyathelo phezu kokucabangela ukuthi ibandla leMovement for Democratic Change (MDC) elikhokhelwa nguMnumzana Morgan Tsvangirai lifuna ukubisela amapulazi kwabamhlophe.
Uhulumende ubeke eceleni izigidi ezingamatshumi amathathu lanye zamadollar eMelika (US$31million) ezasetshenziswa ukuhlolisisa ukuthi abantu abathola amapulazi balamangaki njalo benzani.
UMnumzana Joshua Mhambi ingcwethi ecubungula ezombusazwe utshele uGibbs Dube we VOA Studio 7 ukuthi udaba lomhlabathi lwatshaphazwa libandla le Zanu PF ngakho-ke umsebenzi wokuhlolisiswa kwamapulazi akusoze kuncede, kungaba ngcono ukuthi ukwabelana umhlabathi kuqaliswe kutsha.