Inhlanganiso ehluza okutshiyeneyo emhlabeni jikelele eye Gallup yakwele Melika ithi inzalo ye Zimbabwe isithola inzuzo engconywana kumnotho welizwe loba nje kucatshangelwa ukuthi abanengi bahola imali ephansi.
IGallup esanda kuhluza okwenzakalayo empilweni kazulu eZimbabwe – i2011 survey – itshengisa ukuthi abantu abangafika phose okuyisilinganiso sokungamatshumi amabili ekhulwini bathi baphose bakhombe ngophakathi ngeholo abalithola kumankampani lakuhulumende.
Lokhu kutshengisa ukuthi lababantu sebehlezi ngcono nxa kuqathaniswa lomnyaka ka 2009 lapho okwakulabafanayo abangafika okuyisilinganiso phose sokulitshumi ekhulwini.
Inhlanganiso le iphinde yathi inani labantu abadubekayo abakhulume layo ekuhluzeni imbono yabo ngokutshiyenoyo ezweni bathi kunzima kwele Zimbabwe njengoba kungela msebenzi lokunye nje okokuziphilisa.
Isakhamuzi se Masvingo esicele ukuthi singasiqambi ngegama emoyeni sithi okutholwe yi Gallup kulesisindo loba uzulu elokhe ethwele nzima ngokuzama ukuziphandela.
ingcwethi kwezenotho uMnu. Masimba Guchera uthi iGallup ikhulume labantu abalutshwana kakhulu okutshengisa ukuthi lokhu ekufumane eZimbabwe kungabe kungavezi sobala impilo kazulu.
