Inhlanganiso ye Zimbabwe National Statistics Agency ibika ukuthi isilinganiso sokugugudeka komnotho lokuqonga kwentengo yempahla siyehle safika kusilinganiso sokwedlula kancane okune ekhulwini-4,3% nxa kuqathaniswa lesenyanga kaMpalakazi nyakenye.
Inhlanganiso le ithi lokhu kungabe kubangelwe yikuthi intengo yempahla etshiyeneyo kayikhuphukanga kangako ngenyanga kaZibandlela njengalokho okwenzakale ngoMpalakazi lapho isilinganiso se inflation esafike phose okuyisilinganiso sokuhlanu ekhulwini-4,9%.
Umnu. Eric Bloch ingcwethi kwezenotho uthi okwenze ukuthi isilinganiso se inflation siyehle kakhulu ngenxa yokuthi intengo yempahla yakhuphuka kancane ngoZibandlela.
Kodwa-ke uthi intengo yempahla ikhangelelwe ukuthi ikhuphuke ngoMbimbitho kusiya kuNhlangula lonyaka ngenxa yokuswelakala kokudla kanye lomthelo we surtax ofakwe nguhulumende empahleni ethengwa emazweni.
Umnu. Japhet Moyo ongunobhala jikelele wenhlanganiso yezisebenzi eye Zimbabwe Congress of Trade Unions uthi nxa intengo yempahla ingakhuphuki kakhulu lokhu kwenza ukuthi izisebenzi zenelise ukuziphilisa ngemali encane eziyiphiwa ngabaqhatshi.
Kusenjalo, abalimi begwayi baqalisile ngoLwesithathu ukuthengisa igwayi emikambo ye Harare lapho okukhangelelwe ukuthengiswa izigidi ezilikhulu lamatshumi amahlanu ama kilograms egwayi lonyaka.
Igwayi leli likhangelelwe ukulethela ilizwe izigidi ezingamakhulu amahlanu zamadollar lonyaka.
