Izisebenzi zikahulumende zithi iholo elikhuphukileyo selikhona emabhanga azo okutshengisela ukuthi uhulumende sengezelele iholo lazo.
Izisebenzi ezikhulume le Studio 7 ezisebenzisa amabhanga atshengisa iholo ngomakhalekhukhwini zithi kusobala ukuthi zizathola iholo elabikwa yinhlanganiso ye Apex Negotiating Council kumaviki asanda kwedlula ezakwenza ukuthi isisebenzi esiphansi sithole amakhulu amabili lamatshumi amathathu amadola eMelika.
Zithi loba nje uhulumende engabikanga ukuthi zizathola iholo elikhuphukilyo, kusobala ukuthi zizajabula kusasa zingahamba emabhanga ukuyahola njengoba banengi abathi iholo labo litshengisa ukuthi selingezelelwe.
Kodwa-ke ezinye ezingakaboni imali esemabhanga ziyathandabuza ukuthi zizathola iholo elikhuphukileyo.
Umsekeli womqondisi we Progressive Teachers Union of Zimbabwe uNkosikazi Nokuthula Hlabangane uthi izisebenzi zimelele iholo ngamehlo abomvu.
