Osomabhizimusi bako Bulawayo bazonde bathukuthele ngesenzo sequla ledale le Cabinet elakhethwa ukuzohlolisisa ukuvalwa lokuthutha kwamankampani kulelo dolobho sokwehluleka ukuya emhlanganweni okade uqoqwe ngabamele inhlanganiso zamankampani lezisebenzi.
Umgcinisihlalo we Bulawayo Chamber of Commerce uMnu. Isaac Mabuka uthi osomobhizimusi kade bemelele iqula leli ngamehlo abomvu ngolweSine kodwa kwabuya ababili kuphela – umphathintambo wezamafekithali uMnu. Welshman Ncube lomphathintambo wezamanzi uMnu. Samuel Sipepa Nnkomo.
Abanye babo abangabuyanga ngumphathintambo wezemali uMnu. Tendai Biti, umphathintambo wezokulima uMnu. Joseph Made, umphathintambo wezokuvuselela umnotho uMnu. Tapiwa Mashakada kanye lomphathintambo wezamabhizimusi amancane uNkosikazi Sithembiso Nyoni.
UMabuka uthi okwenziwe ngabaphathintambo laba kutshengise sobala ukuthi kabalandaba lokuvalwa kwamabhisimusi koBulawayo osokutshiye izisebenzi ezizinkulungwane ezingamatshumi amabili zingela msebenzi.
Oka Mabuka uthi kumele iqula leli lijeziswe njalo lokuthi uhulumende adingele osomabhizimusi bako Bulawayo imali yokuvuselela amafekithali lamankampani abo.
