Udubo lokuswelakala kwemali luyaphambili eZimbabwe njengoba abantu makhaza sebelala phandle kwamabhanga bemelele ukuthola imali yabo yokusebenzisa ngesikhathi sekhisimusi.
Kusukela ngomvulo, banengi abehluleke ukuthola imali emabhanga anjenge Commercial Bank of Zimbabwe, Metropolitan Bank, Central African Building Society (CABS) kanye le Post Office Savings Bank (POSB).
Kukhanya kungela madola eMelika lama Rand eSouth Africa emabhanga la.
Ngaphandle kokungatholi imali emabhanga uzulu ubhekane lodubo lokuqonga kwentengo yempahla lembhadalo yokugada amabhasi labotshova osokusenza kube nzima ukuthi abantu bethekelele izihlobo labangani.
Kambe iKhisimusi yalonyaka izaba njani nxa abantu makhaza bengela mali yokuthenga ezifela emlonyeni leyokugada amabhasi labotshova?
Usomabhizimusi onguSenator njalo koBulawayo uMnu. Matson Hlalo lesikhulumeli senhlanganiso yezakhamizi iBulawayo Progressive Residents Association uMnu. Roderick Fayayo bathi abantu loba behlupheka okwamanje ukuthi bathole imali emabhanga lokuthenga ukudla lempahla ye Khisimusi, ikhefu lalonyaka lilakho ukubangcono kulemnyaka edluleyo.
