Umongameli Robert Mugabe, inhloko kahulumende uMnu. Morgan Tsvangirai lomsekeli wakhe uMnu. Arthur Mutambara sebethethe isinqumo sokuthi amalunga edale lephalamende kumele abhadalwe imali yama allowances kusukela ngomnyaka ka 2008 kulokuthi bathole imali yokubumba imthetho kusukela ekuqaleni kuka lwezi lonyaka.
Umnu. Mutambara uthi bathethe isinqumo lesi kulandela ukukhonona kwamalunga ephalamende ngeviki ephelileyo abethusele ukuthi kabasoze bethule ibudget ka 2012 nxa bengabhadalwanga ama allowances abo kusukela ngomnyaka ka 2008.
Umnu. Mutambara uthi amalunga ephalamende abezibhadalela okwemnyaka emthathu nxa esiyahluza imthetho edale lephalamende ngakho-ke babone kungcono ukuthi abhadalwe imali kusukela ngo 2008 kulokuthi bathole limali kusukela ngoLwezi.
Uthe amanye amalunga alakho ukuthola inkulungwane ezidlula itshumi lamadollar emelika okutsho ukuthi uhulumende kumele adinge izigidi ezintathu zamadollar eMelika yokubhadala izikwelede zamalunga elade lephalamende loba kungaziwa ukuthi imali izatholakala njani.
Umnu. Edward Mkhosi omele amalunga ephalamende ebandla le MDC elikhokhelwa nguMnu. Welshman Ncube uthi siyazwisiseka isinqumo esithethwe yinkokheli yamabandla abusayo kulandela eyasithatha ngoMfumfu sokuthi kumele uhulumende angabhadali izikwelede zamalunga edale le phalamede le Senate kusukela ngoLwezi kuphela.
Ingcwethi kwezenotho uMnu. Masimba Kuchera uthi loba nje kulilungelo lamalunga edale lephalamende lokuthi bathole imali yabo, ukubhadalwa kwabo kuzabhidliza ezinye inhlelo zikazulu.
