Usibalukhulu we bhanga elikhulu lelizwe iReserve Bank of Zimbabwe uMnumzana Gideon Gono uthi kasekeli umthetho wokwabelwana kwama shares amabhizimusi eZimbabwe owe Indigenization and Economic Empowerment.
U Gono utshele amaphephandaba ukuthi uhlelo lokulandelwa kwalu mthetho, lwenziwa butshapha ngabantu abalamabhizimusi abanjengamanqe abafuna ukudlithiza amabhizimusi abamhlophe.
U Gono uphinde wathi loluhlelo lwethusa amankampani amanengi akwamanye amazwe afuna ukuvula amabhizimusi eZimbabwe.
UMnu. Sam Ncube, umsekeli womqondisi we Affirmative Action Group utshele uGibbs Dube we Studio 7 ukuthi aqotho amazwi ka Gono okhanya sethungulule kwezenotho.
Kusenjalo, uNkosazana Thabitha Khumalo umsekeli wesikhulumeli sebandla le Movement for Democratic Change elikhokhelwa ngu Mnu. Morgan Tsvangirai uthi abantu abafuna ukuthatha amankampani bahlose ukubulala ilizwe okuzatshiya uzulu esidla ingqweqwe zomlomo.
