Ingcwethi, uzulu kanye labenkolo ezitshiyeneyo bathi akukabi lokudakwa okumangalisayo eZimbabwe okungenza ukuthi kube lomthetho elizweni ozenza ukuthi utshwala buthengiswe okwesikhathi esilutshwane.
Bathi umcebisi kaMongameli Robert Mugabe uMnu. Timothy Stamps kumele akhuthaze umongameli ukuthi alungise izibhedlela esezadilikayo njalo enze inhlelo ezizakhangela impilakahle yabantwana labesifazane.
Umnu. Stamps uxwayise uMongameli Mugabe ukuthi kwethulwe umethetho othi indawo zokunatha utshwala zivulwe ngo six ekuseni, zivalwe ngo seven ntambama njalo zivalwe emini ngesonto.
Ufuna lokuthi utshwala bungathengiselwa owesifazane ozithweleyo, abantu abadakwe okumangalisayo labontanga. Amakhansili lohulumende bathola imali yomthelo we tax evela ekuthengisweni kotshwala esetshenziswa ukuthuthukisa izabelo.
Isikhulumeli se Christian Alliance of Zimbabwe uMnu. Useni Sibanda uthi loba abenkolo zamabandla atshiyeneyo bethakazelela uhlelo lolu, uMnu. Stamps kumele atshele uMongameli Mugabe ukuthi impilakahle kazulu isezandleni zikasomandla njengoba izibhedlela sezadilika.
Ingcwethi kwezokwethekelela indawo zokuzilibazisa uMnu. Zifiso Masiye uthi umthetho lo wenziwa ngabantu abafuna ukuthatha uzulu mahlayana nje.
