UDokotela Peter Magombeyi, owathunjwa ngabacatshangelwa ukuthi badlelana lohulumende weZimbabwe, usesiya kwele South Africa lapho azakwelatshwa khona amatshisela lokunye okuthiwa kusemzimbeni wakhe.
ODokotela abakunhlanganiso yeZimbabwe Hospital Doctors’ Association (ZHDA) bathi okwamanje uDokotela Magombeyi uthwelwe yindizamtshina emusa kwele South Africa.
Amapholisa abemvimbele esibhedlela seAvenues Clinic lapho abehlala khona selokhu wavumbuluka eNyabira ngoLwesine ngeviki ephelileyo.
Umthethwandaba wenze izinqumo ezimbili ezokuthi uDokotela Magombeyi avunyelwe ukuya kwele South Africa.
UDokotela Magombeyi, owathunjwa eHarare, uthi kasakhumbuli okwamehlelayo.
Odokotela abamhlolileyo bathi ulamatshisela aveza ukuthi watshiswa ngomlilo kagetsi njalo wahlatshwa amajekiseni okungaziwayo ukuthi ayelani.
Odokotela laba abakethuleli uzulu abakufumana emzimbeni kaDokotela Magombeyi.
Udokotela Masimba Ndoro, isikhulumeli senhlanganiso yeZHDA, uthi kukhangelelwe ukuthi uDokotela Magombeyi uzathola uncedo olufunakalayo kwele South Africa.
Your browser doesn’t support HTML5
Ingxoxo Esiyenze LoDokotela Masimba Ndoro