Inhlanganiso yezakhamizi eyeCombined Harare Residents Association ithi idolobho leli lilahlekelwa yimali enengi ngenxa yohlupho lokufumbathiswa kwezisebenzi eziguqula inhlawulo yamanzi lokunye.
Umqondisi weCHRA, uMnu. Mfundo Mlilo, uthi kulula ukuphazamisa uhlelo lwemitshina edinda amagwaliba enhlawulo yekhansili olubizwa ngokuthi yiBIQ accounting system.
UMlilo uthi lokhu kwenziwa yikuthi uzulu ubhadala imali kuzisebenzi ezilakho ukuthi zithathe eyinye imali zizifakele esikhwameni ingakangeni emitshineni le.
Uthi izisebenzi zejwayele ukwehlisa inhlawulo okumele ibhadalwe yizakhamizi sezifumbathisiwe.
UMlilo uthi lokhu kungenqabelwa ngokubhadala inhlawulo yekhansili kusetshenziswa omakhalekhukhwini loba ebulenjini beinternet.
Idolobho leHarare lithi liyakwazi mhlophe okwenziwa yizisebenzi yikho nje zizama ukufundisa uzulu ngomkhankaso wokuhlawulela imithelo esebenzise omakhalekhukwini ekubhadaleni inhlawulo kakhansili.
Kasenelisanga ukukhuluma leziphathamandla zedolobho leli ekade zingaphenduli omakhalekhukhwini.
Kodwa-ke senelise ukukhuluma lokhansila weWard 13, uMnu. Peter Moyo, othi kumele uzulu aqalise ukusebenzisa omakhalekhukhwini nxa ebhadala inhlawulo zedolobho leli.