Yingxabangxoza Enhlelweni zeMarange Community Share Ownership Trust

WASHINGTON DC —  NgoLesine amalunga edale lephalamende athwalise nzima uMnu. Francis Nhema umphathintambo wazabasakhulayo lokuthuthukisa umnotho wabansundu ngendlela okwaphathwa ngayo uhlelo lweMarange-Zimunya Community Share Ownership Trust.

UNhema utshele amalunga edale lephalamende awekhomithi ebona ngohlelo lokwabelana amashares amankampani emazweni olwe Indigenization ukuthi akutshengisi ukuthi amankampani emba amadayimana eMarange abhalelana phansi lohulumende izivumelwano zokubhadala imali yohlelo lolu.

UNhema uthe iziphathamandla zikahulumende zazixoxisana ngomlomo labaqondisi bamankampani anjenge Anjin Investments, Mbada Diamonds, Diamond Mining Company le Marange Resources ukuthi bafake izigidi ezilitshumi - $10 million yinye ngayinye ekubumbeni iMarange – Zimunya Community Share Ownership Trust.

Uthi lokhe ehlolisisa ukuthi izivumelwano lezi zenziwa njani njengoba amankampani la ephikisa ukuthi athembisa ukufaka imali yokubumba isikhwama sohlelo lolu.

Abaqondisi bamankampani la batshele idale lephalamende ukuthi kwakungakhanyi ukuthi kwenzakalani kubunjwa isikhwama lesi ngakho-ke abanye babo abakafaki imali ku Marange – Zimunya Community Share Ownership Trust okubikwa ilenkulungwane ezingamakhulu amane amadollar eMelika – $400,000.

Imali le lokhe ingakasetshenziswa. Sokwabunjwa ama community share ownership trust edlula amatshumi amamahlanu elizweni lonke jikelele kodwa inengi labantu lithi akwaziwa ukuthi imali ekulezozikhwama yenziwani.

Ukuze sihlaziye udabalolu akesizwe uMnu. Morris Ngwenya ingcwethi kwezombusazwe osekela ibandla le Zanu PF loMnu. Bekezela Maduma ingcwethi njalo kwezenotho lezombusazwe abangavumelani ngitsho lakancane ngohlelo lolu.

Ingxoxo Esiyenze LoMnu. Bekezela Maduma LoMnu. Morris Ngwenya