Izizalwane ezinengi zeZimbabwe zikhangelelwe ukuncintisa ukuthi zingene kuhlelo lwabasakhulayo abakhaliphileyo olusekelwa nguMongameli Barack Obama weMelika olwe Mandela Washington Fellowship for Young African Leaders.
UNkosazana Nicole Fox, okhangele ngenhlelo zikazulu esigodlweni Sommeli weMelika eZimbabwe, uthi abafuna ukungena kuhlelo lolu kumele baye kuwebsite yeYoung African Leaders Initiative baziveze isimo sabo semfundo lokukhalipha.
UNkosazana Fox uthi inani labakhangelelwe ukuba lesifiso sokungena kuhlelo lolu bazakwedlula inkulungwane.
Ngomnyaka ophelileyo kube lenkulungwane eyodwa zabasakhulayo abadinge ukungena kuhlelo lolu.
Abangamatshumi amathathu benelise ukuphumelela ukungena kuhlelo lolu lokulolonga imisebenzi yabasakhulayo. Abantu abazinkulungwane ezingamatshumi amahlanu – 50,000 bebefuna ukungena kuhlelo lolu ezwekazi leAfrica kodwa kwangena abangamakhulu amathathu – 300 kuphela.
Ukuze sihlaziye udaba lolu, sixoxe loNkosazana Abbigail Muleya ongomunye wabanelise ukungena kuhlelo lolu ngomnyaka ophelileyo okhuthaza abasakhulayo bonke ukuthi bazame ukungena.